بسم الله الرحمن الحيم
الناس اتخنقت .. طلعوا في مظاهرات .. اتضرب عليهم نار ... في شهدا كتير ... في كل المحافظات .. بقت ثوره كبيره ... وانسحبت الشرطه .. ونزل الجيش .. ال هيحمي الثوره .. وزادت الاعتصامات .. وتهديد باعتصام مدني .. وتخلى المخلوع عن السلطه ... وبعد ما تخلى سلمها للجيش .. اصلها عزبة ابوهم ... والجيش تعهد هينفذ المطالب .. والناس روحت .. واتقبض على ناس كتير من الوزرا .. وسابوا زكريا عزمي علشان يظبط الناس اللي في السجن .. وظهر ناس بتقول احنا اسفين يا ريس .. والكلاب المنافقين اللي كانوا بينافقوا مبارك ما ماتوش ... بقوا بينافقوا المجلس العسكري .. معظم وسائل الاعلام .. وظهرت الثوره المضاده .. وعرفنا يعني ايه فلول .. وزادت الفتن في مصر .. وزير الماليه يقولك هنشحت .. ال يعني كنا بنرمي فلوسنا في البحر من كترها قبل الثوره .. وزير الداخليه يقولك ما فيش شرطه قتلت متظاهرين .. والفيديوهات موجوده تخرق عينه اللي تتعور ان شاء الله .. وهي دي تصريحات وزارة الثوره .. وظهرت جمل تجيب الضغط .. ادي اللي اخدنا من الثوره ... مش هي دي الديمقراطيه اللي انتوا عاوزينها ؟ انا باحب حسني مبارك .. يا اخي حبك برص .. و6 ابريل انقسمت ... وكالعاده الاخوان باعوا القضيه وتحالفوا مع العسكر ... و456778907543 ائتلاف للثوره ... والمجلس العسكري مطنش على مبارك واتباعه ... وطلعت اشاعات ان جمال وعلاء مش محبوسين ... وطلع مبارك ما فيش امر بحبسه ... والناس اخدت براءه من قضايا فساد ... والظباط اللي قتلوا الشهدا بيترقوا في مناصبهم .. واهالي الشهدا بيتضربوا عند البالون ... والابطال تحولوا لماده للهجوم عليهم .. والسلفيين هايصين في النص ... والاقباط عاوزين يطلقوا ويتجوزوا .. واقباط المهجر عاوزين دوله في صعيد مصر ... ده حتى في الصعيد ما ينفعش ... والسويس تاني انتفضت وقامت .. وقامت وراها مصر كلها .. واخيرا سمعنا صوت عصام شرف ... ما قالش حاجه عليها القيمه .. وبعدين اللوا الفنجري .. كرهنا في المجلس العسكري اكتر ما احنا كارهينه .. واللوا الرويني .. مش عاجبه اللجاهن الشعبيه في الميدان .. وحرضوا الشعب على بعضه .. وقاللك تغيير وزاري .. وهتبقى المحاكمات علانيه ... وايقاف الضباط المتورطين عن العمل .. لا والله كتر خيرهم .. وفي ناس نزلت في روكسي .. عاوزين شفيق يا راجل يبقى رئيس .. والمعتصمين اختفوا .. يمكن زهقوا ويمكن صدقوا .. يعني الناس روحت .. والسؤال دلوقتي ... يا ترى هينزلوا تاني امتى .. لان المجلس العسكري مش هيعمل حاجه .. يعني بعد ما اتوحدنا في ميادين مصر ... وذابت كل الخلافات .. اول مبارك ما قال اتخلي .,. ده حتى ما لحقش .. ده يا دوب قال اتخ .. اتفرقنا تاني وكل شويه راحوا لحزب .. يعني بقينا احزاب .. دي بقت حاجه تقرف
0 التعليقات:
إرسال تعليق