بسم الله الرحمن الرحيم
بعد البيان اللي قاله رئيس الوزرا عصام شرف امس حسيت كده بغضه وحاجات وحشه منها على سبيل المثال ( كركبه في البطن )
وبعدين قلت يا واد ما تشوف كده قناة النيل للاخبار ايه رد فعلها ... يا ترى هتطبل زي الاول ولا حالها اتعدل ولا ايه بالظبط ... المهم قعدت ادور عليها ساعه لانها اصلا سقطت من ذاكرة الريموت ولما لقيتها بعد عناء .. كان في مذيع كده حليوه ومسمسم .. قلت في نفسي ( انت اللي هتطبل يا حبيبي ) .
وكان في اتصال من محافظ السويس اللواء ( كل شيء هاديء ) اه هو غالبا اسمه كده وكان منفعل جدا على القنوات الخاصه اللي بتهيج
الراي العام وبتقول اكاذيب
طب ايه هي الاكاذيب دي سيادتك يا سيادة اللوز
قال سيادة اللواء
ان كل شيء في السويس هاديءوتحت السيطره وان الاعداد اللي بتيجي في القنوات التانيه اعداد مبالغ فيها جدا لانهم الصبح المعتصمين اللي في ميدان الاربعين بيكونوا عشره او 15 وبالليل بيوصلوا ل 150 بالعافيه
نفس الحال للمعتصمين بتوع مكتب الارشاد بيكونوا بنفس الاعداد يعني مش السويس كلها في الشارع ولا حاجه
حفظت رقم القناه علشان اعرف ارجع لها بسرعه واخدت لفه على باقي القنوات تكون قناه منهم جايبه السويس مباشر لقيتهم اللي يتشكوا في قلوبهم مش جايبين غير ناس قاعده تتكلم
رحت راجع بسرعه على سيادة اللوا لقيته بيقول وانه طول الوقت سايب مكتبه وقاعد معاهم وبيشرب معاهم شاي وانه كان بيتفرج معاهم على البيان وانهم قاموا بعدها مبسوطين والكلام اللي قاله عصام شرف ارضاهم الى حد كبير
اقسم بالله انه قال كده
طبعا فضلت صابر لما اشوف اخرتها ... المذيع اتصل بعدها بالمتحدث الرسمي باسم اسر شهداء الثوره
وساله هو كلام المحافظ ده بجد وبحق وحقيق ؟
قاله لا طبعا ده كلام فارغ والبيان نفسه كلام فارغ
وبعدين يا جدعان هو احنا مش هنخلص من المحافظين اللي لسه بيطلعوا يقولوا كله تمام سيادتك ؟
المفروض يبقى اول طلب واول حاجه تتعمل تطهير الاعلام في القنوات الحكوميه والخاصه والصحف الحكوميه والخاصه علشان لما يطلع محافظ زي ده ويقول كلام زي ده .. المذيع اللي قاعد بيسمعه ما يكتفيش بهز الراس
لا المفروض يقوله زي محمود سعد ما قال لانس الفقي بعد ما اقالوا انس الفقي وطلع يسيح لمحمود سعد
( سيادتك كداب يا افندم )
شكرا
0 التعليقات:
إرسال تعليق