حديقة حيوان طره

يا مسهل يا رب ..
السلام عليكم .. عندي النهارده فكره انما بمليون جنيه او نظريه جديده علشان نستوعبها مع بعض يقى نقول المعطيات والمطلوب والبرهان
علشان تبقى ماشيين صح وبشكل علمي .. انتوا عارفين ان انا علمي مش عالم ولا علماني .. هاهاها



المعطيات


في قضايا الفلوس والتربح والكسب غير المشروع .. عندنا في السجن ناس كتير اوي يعني مثلا عز وجرانه والمغربي وجمال وعلاء .. الخ الخ الخ الخ الخ وبما اننا متاكدين انهم سارقين فلوس كتير جدا جدا وموزعينها على اقاربهم واهاليهم واصدقائهم وفي ناس كتير اتربحت منهم وغاسلين فلوسهم بره مصر كتير جدا ........... اظن ده شيء مصر كلها متفقه عليه ومصر كلها متأكده منه وبما ان احنا متاكدين ان احنا بعد خمسين سنه ان شاء الله وعليكم خير لما نبقى نعرف نجيب ربع الفلوس اللي بره ده لو عرفنا نجيبهم علشان اسباب كتير جدا اول سبب ان انا حاسس ان اصلا جهات التحقيق مش عاوزه تمشي في سكة ان الفلوس ترجع دي ومش عارف ليه تاني سبب ان القصه دي عاوزه اجراءات طويله ومعقده ولا تحتمل الاخطاء واحنااكيد عندنا حد من المسئولين هينسى كلمه او هينسى ورقه واهو كله بتمنه تالت سبب ان في وزارة احمد شفيق كان في وقت كتير حدا ضاع علينا وهما كسبوا وقت كتير يستفوا فلوسهم ويوزعوها بره لدرجة ان هما بيقولوا ان مبارك ما معهوش يدفع تمن المستشفى وناقص يقولولك تبرعات


المطلوب


ان احنا عاوزين نبني مصر وعاوزين فلوسنا ترجع بسرعه



الحل او البرهان


احنا نعمل حوالي 300 قفص حديد كبير .. طوله 2 متر وعرضه 2 متر ونحطهم بشكل متوازي بمعنى ان 150 قفص جنب بعض وال150 التانيين قدامهم ويكون مسافه بين كل قفص والتاني حوالي 2 متر ويكون الاربع جهات مفتوحين تاني حاجه نجيب الحراميه الكبار ونحط كل واحد في قفص من الظهر لغاية المغرب وهو ده الوقت بس اللي يطلع فيه من زنزانته وياكل غداه فيه وما فيش تواليت او حمام او دورات مياه من الظهر للمغرب تالت حاجه هنعمل تذاكر دخول للمصريين لملحق طره يدخلوا يتفرجوا عليهم وتكون مدة التذكره ربع ساعه اسعار التذاكر هتتفاوت يعني للمواطن البسيط هتكون ب10 جنيه لرجال الاعمال ب 100 جنيه الدخل بتاعهم يروح لرئاسة الوزراء بس وزارة الداخليه او السجن ياخدو 10% علشان الاجور والمصاريف ممنوع على الزوار التحدث مع الحراميه او انه يسبهم مسموح للزوار انهم يصوروهم وممكن كمان يرموهم بالسوداني عند دخول وافد جديد يمتد الوقت له حتى الساعه العاشره مساء بعد الوقت المحدد يتم تسريح الحراميه كل الى زنزانته الانفراديه واللي هي وصفها زي وصف الزنانزين في القصص زنزانه رطبه مساحتها لا تتجاوز متر ونص في متر ونص لا يوجد بها شبابيك ولا يوجد بها اضاءه وطبعا ممنوع دخول التليفونات والمراوح وممنوع كمان ياكلوا اكل من بره السجن


النتيجه


احنا لا ضربنا ولا شتمنا ولا حاجه يعني ما حدش يقولي حقوق انسان وكلام من ده اللي هييجي يقول حقوق انسان مع الناس دي ييجي يجيب لنا حقوقنا منهم بسرعه على اعتبار ان احنا ( والله ما انا عارف جمع انسان ايه ) ممكن اناس
واقسم بالله اني متاكد ان اكتر واحد فيهم ما عندوش دم مش هياخد اكتر من اسبوع وهيجيب لنا كل اللي عنده .. اللي احنا نعرفه واللي ما نعرفوش وهنديلهم اوبشن كويس اللي يجيب الفلوس اللي سرقها كلها ويبلغ عن اتنين من الحراميه اللي بره وما يكونش عليه حاجه غير قضايا الفلوس يطلع براءه بس يتمنع من السفر وممكن نديله 10000 جنيه يبقوا بس هما اللي حيلته ونشوف هيبني نفسه ازاي وهيسكن فين وهيشتغل ايه علشان يعرفوا هما كانوا بيطلبوا من شباب مصر ايه
فما رايكم ادام الله فضلكم ؟


اقرأوا ايضا



البلطجيه والطبلجيه